Өңірлік коммуникациялар қызметінде өткен брифингте Қазақ онкология және радиология ғылыми-зерттеу институты басқарма төрағасының орынбасары Айша Молдашева 2023–2027 жылдарға арналған онкологиялық аурулармен күрес жөніндегі Кешенді жоспар аясында онкологиялық қызметті жаңғырту мен радиациялық онкологияны дамыту туралы айтты, - деп хабарлайды Aqshamnews.kz.
Оның айтуынша, қазіргі таңда Қазақстанда 22 сызықтық үдеткіш пен 20 гамматерапиялық аппарат жұмыс істеп тұр. 2024 жылы еліміздің біраз өңірінде қосымша алты жаңа сызықтық үдеткіш пайдалануға берілген. Бұл сәулелік терапиямен қамтылған пациенттердің үлесін 65 пайызға дейін арттырып, емдеуді белгіленген мерзімде жүргізуге мүмкіндік берді.
«Жаңа қондырғыларды енгізу сәулелік терапияның осы заманғы технологияларын — адаптивті терапияны, 4D-гейтингті, стереотактикалық әдістерді қолдануға жол ашты. Мұның бәрі емдеудің дәлдігін арттырып, сау тіндерге түсетін жүктемені азайтады, терапияны да қауіпсіз, тиімді етеді», — деп атап өтті Айша Молдашева.
Сондай-ақ ол 2025 жылғы 1 қазаннан бастап томотерапия жоғары технологиялық медициналық көмек тізбесінен мамандандырылған медициналық көмек тізбесіне ауыстырылып, стационарды алмастыратын деңгейде көрсетілетінін, сонымен қатар кепілдендірілген тегін медициналық көмек көлемі аясында сақталатынын түсіндірді. Бұл шешім, ең алдымен, сәулелік терапияның сапасын арттыруға бағытталған.
Бұдан бөлек, онкологиялық қызметті жаңғырту аясында радиациялық онкология саласындағы мамандардың біліктілігін арттыру бойынша жүйелі жұмыс жүргізіліп жатыр. 2024–2025 жылдары радиациялық онкологтар мен медициналық физиктерге арналған кәсіби оқыту бағдарламалары, соның ішінде Испания, Франция және Түркияның жетекші онкологиялық орталықтарындағы шетелдік тағылымдамалар іске асырылды. Бұл клиникалық практикаға халықаралық стандарттарға сай замандық тәсілдер мен озық сәулелік терапия технологияларын енгізуге мүмкіндік берді.