Премьер-Министрдің орынбасары Серік Жұманғарин Мәжіліс депутаттарының сауалына орай тауар несиесі ретінде қанша үй жануары берілгенін айтты, деп хабарлайды aqshamnews.kz.
"Облыс әкімдіктерінің мәліметіне сәйкес, бүгінгі күні жол картасы (Ауылдық елді мекендер мен шағын қалаларда тауарлық кредиттерді беру тетігін іске асыру жөніндегі жол картасы) аясында өңірлерде 309 жылқы, 6 түйе, 3 261 ірі қара мал және 4,7 мыңнан астам ұсақ мал тауар несиесі ретінде үлестірілген. Жалпы тауар несиесін беру тетігі жол картасы ауқымында облыс әкімдіктерінің және аймақтық әлеуметтік-кәсіпкерлік корпорацияларының ұйымдастыруымен және олардың сүйемелдеуімен іске асырылып жатқандығын атап өткен жөн", – деді вице-премьер жауабында.
Оның атап өтуінше, тауар несиесі тәсілін іске асыруға бюджет қаражаты бөлінбей, жоғарыда аталған жол картасын іске асыру аясында бизнестің әлеуметтік жауапкершілігі бойынша жүргізіледі.
"Осылайша, тауар несиесінің тәсілі арқылы көптеген ауыл тұрғыны үшін жаңа жұмыс орындарын құра отырып, ауылда өз кәсібін ашуға, ауыл шаруашылығы өнімдерін өндіру көлемін ұлғайтуға, мал басы санын өсіруге мүмкіндік беріліп отыр", – деді Серік Жұмағарин.
Айта кетейік, Мемлекет басшысы Қасым-Жомарт Тоқаев "Әділетті Қазақстан: заң мен тәртіп, экономикалық өсім, қоғамдық оптимизм" атты Жолдауында "Ауыл аманаты" жобасы аясында тағы бір жаңа тәсілді, яғни "тауар несиесін" беру мәселесін қарастыру қажеттігін айтқан болатын.