Еуропалық қайта құру және даму банкі (ЕҚДБ) Empire Manufacturing Kazakhstan (EMK) компаниясына 10 миллион АҚШ долларына дейін несие бөледі. Бұл қаражат компанияға Қазақстанның «Хоргос» арнайы экономикалық аймағында заманауи кофе өңдеу зауытын салып, іске қосуға және жаңа жұмыс орындарын ашуға мүмкіндік береді, деп хабарлайды aqshamnews.kz
Жаңа зауытта өндірілетін кофенің шамамен 50 пайызға жуығы Орталық Азия мен Кавказ аймақтарына экспортталады деп күтілуде. Бұл жоба аймақтың кофемен қамтамасыз ету көлемін арттыруға және халықаралық нарықта бәсекеге қабілетті болуға ықпал етеді.
EMK — халықаралық азық-түлік және сусындар өндіру мен тарату саласында жұмыс істейтін Food Empire Holdings тобының еншілес кәсіпорны. Компанияның акциялары Сингапур биржасында саудаланады.
Айта кетейік, ЕҚДБ Қазақстанда жалпы сомасы €11 миллиардтан астам қаржыны 335 жобаға инвестициялаған. Бұл инвестициялардың басым бөлігі жеке кәсіпкерлік секторын қолдауға бағытталған.