Мәжілісте қаралып жатқан арнайы мемлекеттік органдар қызметіне қатысты заң жобасында экстремистік және террористік материалдарды сақтауға тыйым салу нормасы енгізілмек, – деп хабарлайды aqshamnews.kz тілшісі.
Депутат Болат Керімбек қолданыстағы заңнамада мұндай материалдарды әкелуге, шығаруға, дайындауға және таратуға тыйым бар екенін атап өтіп, енді оларды сақтауға да шектеу енгізу ұсынылып отырғанын айтты.
Талқылау барысында Мәжіліс депутаты Дмитрий Колода бұл нормаға қатысты сұрақ қойды. Оның айтуынша, Әкімшілік құқықбұзушылық туралы кодексте (ӘҚБтК) мұндай материалдарды сақтағаны үшін жауапкершілік бұрыннан қарастырылған. Осыған байланысты ол арнайы заңдарға бұл норманы енгізудің қажетін нақтылады.
ҰҚК төрағасының орынбасары Алмас Наймантаев бұл түзетудің нақтылаушы сипатта екенін түсіндірді.
"Бұл түзету экстремизм мен терроризмге қарсы іс-қимыл туралы салалық заңдарды ӘҚБтК нормаларымен сәйкестендіруге бағытталған. ӘҚБтК-де мұндай материалдарды сақтағаны үшін жауапкершілік бұрыннан бар. Алайда салалық заңдарда тек әкелу, дайындау және таратуға ғана тыйым көрсетілген. Сондықтан енгізілетін өзгерістер жауапкершілікті күшейтпейді, тек нақтылау сипатында болады", – деді Алмас Наймантаев.
ӘҚБтК-нің 453-бабына сәйкес, тыйым салынған материалдарды сақтағаны үшін:
• жеке тұлғаларға – 20-дан 200 АЕК-ке дейін (2026 жылы 86 500 – 865 000 теңге);
• лауазымды тұлғаларға – 25-тен 300 АЕК-ке дейін (108 125 – 1,2 млн теңге);
• бизнес субъектілеріне – 50-ден 2000 АЕК-ке дейін (216 250 – 8,6 млн теңге) айыппұл қарастырылған.
Жаза мөлшері құқықбұзушылықтың ауырлығына байланысты анықталады.