2025 жылы Қазақстанда 54,4 мың отбасыны қамтыған 292,7 мың адамға жалпы сомасы 33,4 млрд теңге атаулы әлеуметтік көмек (АӘК) төленді, деп хабарлайды Aqshamnews.kz тілшісі.
Еңбек және халықты әлеуметтік қорғау министрлігінің мәліметінше, атаулы әлеуметтік көмектің негізгі мақсаты – отбасыларға ақшалай қолдау көрсету және еңбекке қабілетті мүшелерін жұмыспен қамтудың белсенді шараларына тарту арқылы қиын өмірлік жағдайдан шығуына ықпал ету.
АӘК аясында табысы кедейлік шегінен аспайтын азаматтарға тоқсан сайын әлеуметтік көмек тағайындалады. Сонымен қатар, табысы аз отбасылардағы 1 жастан 6 жасқа дейінгі әр балаға ай сайын 1,5 АЕК мөлшерінде қосымша төлем қарастырылған. 2025 жылы АӘК алушы отбасылар қатарындағы мектеп жасына дейінгі 91,1 мың балаға 4,1 млрд теңге көлемінде қосымша төлем берілген.
Бұдан бөлек, атаулы әлеуметтік көмек алушыларды жұмыспен қамту шаралары да жүзеге асырылады. Атап айтқанда, жұмысқа орналастыру, өз ісін ашуға ниетті отбасыларға грант беру, қажет болған жағдайда біліктілікті арттыру курстарына жолдау көзделген.
АӘК тағайындау үшін өтінішті азаматтар тұрғылықты жері бойынша мансап орталығына, ауылдық округ әкімдігіне немесе электрондық үкімет порталы (egov.kz) арқылы бере алады.
Айта кетейік, жауапты министрлік басшысы Президент Қасым-Жомарт Тоқаевқа берген есебінде Қазақстанда АӘК төлеудің жаңа тәсілі енгізілетінін хабарлаған. Ал 2024 жылдың қорытындысы бойынша 413,7 мың адамға 39,5 млрд теңге көлемінде атаулы әлеуметтік көмек көрсетілген.
