Қазақстанда алаяқтар жалған тұлғалар (дропперлер) арқылы 24 миллиард теңгені ($45 миллион) заңсыз айналымға енгізген. Бұл туралы Қаржы мониторингі агенттігі мәлім етті, деп хабарлайды aqshamnews.kz.
Агенттіктің мәліметінше, 2024 жылы 6 мыңнан астам дроп-карта тіркелген. Оларды көбінесе есірткі саудасы, кибералаяқтық және заңсыз құмар ойындары үшін қолданған. Банктік карталар мен есепшоттар жұмыссыздар, студенттер мен зейнеткерлердің атына рәсімделген.
Алаяқтар қарапайым азаматтарды аз мөлшерде ақша ұсынып, карталарын немесе жеке деректерін беруге көндіреді. Осылайша, оларды заңсыз схемаларға тартып, қылмыстық әрекеттердің бір бөлігіне айналдырады. Қаржы мониторингі агенттігі азаматтарды жеке деректерін ешкімге бермеуге және күмәнді ұсыныстардан бас тартуға шақырады.