Қазақстанда алимент бойынша берешек көлемі 18 млрд теңгеге жетті. Әділет министрлігінің мәліметінше, проблемалы істердің басым бөлігінде борышкерлер табысын жасырып, кірісін төмендетіп көрсетуге тырысады, – деп хабарлайды aqshamnews.kz тілшісі.
Қазақстанда баласына алимент төлемей жүрген әкелердің берешегі 18 млрд теңгеге жеткен. Бұл туралы Орталық коммуникациялар қызметінде өткен брифингте Әділет министрлігі Міндетті атқару комитетінің төрағасы Мақсат Балабеков мәлімдеді.
Оның айтуынша, биыл алимент өндіруге қатысты құжаттардың саны өткен жылмен салыстырғанда азайған. Мәселен, 2025 жылы 354 мың құжат бойынша мәжбүрлеп алимент өндірілсе, оның 60 мыңы орындалған. Ал биыл мұндай құжаттар саны 295 мың болған.
Сонымен қатар 12,7 мың алимент ісі проблемалы санатқа енгізілген. Осы істер бойынша жалпы қарыз көлемі 18 млрд теңгені құрап отыр.
Комитет төрағасының сөзінше, алимент қарызы көбіне борышкерлердің жалақысынан өндіріледі. Алайда кейбір әкелер төлемнен жалтару үшін табысын жасырып, кірісін әдейі төмендетіп көрсетеді.