Құжаттар тізімі екі есе қысқарды.
Бүгін ҚР Индустрия және инфрақұрылымдық даму министрінің №432 бұйрығына өзгерістер күшіне енді. Онда бірыңғай оператор – «Қазақстан Тұрғын үй Компаниясы» АҚ кепілдігін алу үшін құжаттар 2 есе қысқартылды, деп хабарлайды Almaty-akshamy.kz.
«Біз бизнеспен бірқатар кездесулер өткіздік, артық талаптарды алып тастадық, қарапайым және ашық рәсімдерді енгізіп жатырмыз. Әзірлеушілер өз өтінімдерін портал арқылы тұрақты негізде онлайн тапсыра алады және жеке кабинеттер арқылы статустарын бақылап отыруға болады. Барлық кезеңдерде цифрлық із қалады».
«Биыл біз 1 трлн. теңге межесінен өтеміз. Шағын және орта компаниялар, әсіресе өңірлердегі компаниялар біздің кепілдігімізді алу мүмкіндігіне ие болуы үшін заңнамалық талаптарды төмендету бойынша жұмыс істеудеміз. Егер жоба бойынша дефолт орын алса, онда ҚТК өз қаражаты есебінен тұрғын үйдің құрылысын аяқтайды және оны үлескерлерге береді, азаматтардың қаражатының 100% сақталуы қамтамасыз етіледі», - деп түсіндірді төраға орынбасары Олжас Салықов.
Кепілдік беру тетігі арқылы барлығы 862 млрд. теңгеге 178 жоба мақұлданды. Бұл елдегі 53 мың үлескердің салымдарын қорғауға мүмкіндік берді.