Жаңа шаралар мен квоталарды ауыл шаруашылығы министрлігі енгізіп отыр, деп хабарлайды aqshamnews.kz
Қазақстанның Ауыл шаруашылығы министрлігі ірі қара етін экспорттауға сандық шектеулер (квоталар) енгізетін бұйрықты жариялады.
Құжат жаңа, салқындатылған және мұздатылған етке қатысты. Шектеу ЕАЭО елдеріне және үшінші мемлекеттерге экспортқа 13 мың тонна көлемінде енгізіледі.
Министрлік квоталарды бөлу ережесін бекітті. Квота жеке және/немесе заңды тұлғаларға, соның ішінде экспорттық компанияларға бөлінеді. Олардың өздерінің ет өңдейтін зауыты болуға тиіс.
Сонымен қатар қуаттылығы кемінде 5 мың бас ірі қара малды азықтандыруға жететін жеке мал жемдейтін алаңы болуы керек.
"Ірі қара малдың жасы кемінде 12 айға толған, ауыл шаруашылығы жануарларын идентификациялау базасында тіркелген, жемдеу ұзақтығы кемінде 4 ай болуы қажет. Сондай-ақ аталмыш малдың құлағында RFID радиожиілікті белгі болуға тиіс. Квота көлемі бөлінген кезде бір бас малға орташа салмақ ретінде 200 кг есепке алынады", - деп жазылған бұйрықта.
Сондай-ақ сыртқы сауда келісімдері талап етіледі. Бұйрық 2025 жылғы 2 желтоқсаннан 31 желтоқсанға дейін енгізіледі.
