2026 жылғы 26 маусымда Тараз қаласында Қырғыз Республикасының Құрметті консулы кеңсесінің ашылу салтанаты өтті, – деп хабарлайды aqshamnews.kz тілшісі.
Ресми ашылу рәсіміне Қырғыз Республикасының Алматы қаласындағы Бас консулы Жеңішбек Асанқұлов қатысты.
Іс-шараға Тараз қаласының әкімі Бақытжан Орынбеков, Талас қалалық кеңешінің төрағасы Әліби Жұманов, Қырғыз Республикасының Тараз қаласындағы Құрметті консулы Жанұзақ Бейсеубаев, сондай-ақ Қырғыз Республикасының Талас облысы мен Қазақстан Республикасының Жамбыл облысының іскер топтарының өкілдері қатысты.
Іс-шара аясында Тараз қаласының әкімі Бақытжан Орынбеков пен Талас қалалық кеңешінің төрағасы Әліби Жұмановтың кездесуі өтіп, тараптар өңіраралық ынтымақтастықты одан әрі дамыту мәселелерін талқылады. Сонымен қатар, Қырғыз Республикасының Талас облысы мен Қазақстан Республикасының Жамбыл облысы кәсіпкерлерінің сауда-экономикалық ынтымақтастықты кеңейтуге және әріптестік байланыстарды нығайтуға арналған бизнес-кездесуі ұйымдастырылды.
Кездесуге қатысушылар Қырғыз Республикасының Тараз қаласындағы Құрметті консулы кеңсесінің ашылуы қырғыз-қазақ қатынастарын одан әрі нығайтуға, өңіраралық ынтымақтастықты жандандыруға, сондай-ақ бауырлас екі мемлекет арасындағы сауда-экономикалық және инвестициялық байланыстарды кеңейтуге бағытталған маңызды қадам болатынын атап өтті.
Қырғыз Республикасының Алматы қаласындағы Бас консулы Жеңішбек Асанқұлов Құрметті консул кеңсесінің қызметі екіжақты ынтымақтастықты дамытуға, Қырғыз Республикасының азаматтары мен кәсіпкерлік субъектілеріне қолдау көрсетуге, сондай-ақ Қырғыз Республикасы мен Қазақстан Республикасы арасындағы достық, тату көршілік және өзара тиімді ынтымақтастық қатынастарын одан әрі нығайтуға ықпал ететініне сенім білдірді.
Сапар аясында Талас облысының іскер топтарының өкілдері «Dala Glass» табақша шыны өндіру зауытында, Жамбыл облыстық тарихи-өлкетану музейінде және Кардиохирургия және трансплантология ғылыми-клиникалық орталығында болып, Жамбыл облысының өндірістік, ғылыми және мәдени әлеуетімен танысты.