Қазақстан Республикасы Ішкі істер министрлігі тұрғындарды тіркеу қажеттілігін тағы да еске салды. Құқық бұзушылықтың алдын алу мақсатында полиция "резеңке" пәтерлерді тексеруді бастайды. Бұл шараның негізгі мақсаты — заңсыз көші-қонды тоқтату, деп хабарлайды aqshamnews.kz
Ішкі істер министрлігінің өкілдері азаматтарды тіркеусіз, құжатсыз тұру немесе уақытша тұруға тіркеу жасамай тұру заңмен жазаланып, айыппұл салынатынын ескертті.
Қазіргі таңда тіркеуден өту өте оңай:
- Бірінші әдіс — кез келген Халыққа қызмет көрсету орталығына бару. Ол үшін жеке куәлік пен тұрғын үй иесінің қатысуы қажет.
- Екінші әдіс — "Электронды үкімет" порталы арқылы онлайн тіркелу. Бұл тәсілде азамат өтініш береді, ал тұрғын үй иесі келісімін білдіреді.
- Үшінші әдіс — Ішкі істер министрлігі мен банктердің мобильді қосымшалары арқылы тіркеу. Бұл әдіс SMS-пароль арқылы азаматтың жеке басын тексеру, тіркеу және тұрғын үй иесінің келісімін алу мүмкіндігін ұсынады.
Осы әдістер арқылы азаматтар тіркеуден өтіп, заң талаптарына сай бола алады.