ОПЕК+ келісіміне қатысушы елдердің министрлер мәжілісінде Қазақстанның ақпан айындағы мұнай өндіру квотасы 1,589 млн баррель болып белгіленді, деп хабарлайды Almaty-akshamy.kz Энергетика министрлігінің баспасөз қызметіне сілтеме жасап.
ОПЕК+ келісіміне қатысушы елдердің министрлер мәжілісі бейнеконференция форматында өтті. Жиында желтоқсан айының деңгейі талқыланды. Мәселен, Қазақстанның міндеттемелерді орындау деңгейі желтоқсан айында 122% болған.
«Отырыс қорытындысы бойынша, шектеулерді толық алып тастағанға дейін ОПЕК+ елдерінің қазіргі мұнай өндіру деңгейін ай сайын тәулігіне 400 мың баррельге арттыруды жалғастыру туралы шешім қабылданды», - деп жазылған министрліктің мәліметінде.
Мұның ішінде Қазақстанға белгіленген квота да артып отыр.
«Қаңтар және ақпан айларында ОПЕК+ шеңберінде Қазақстан үшін квота сәйкесінше тәулігіне 1,572 және 1,589 млн баррельді құрайды. 2022 жылғы наурыздағы міндеттемелер тәулігіне 1,605 млн баррельді құрайды», - делінген ресми түсіндірмеде.