2024 жылғы 28 қазанда Ұлан-Батыр қаласында Қазақстан Республикасының Президенті Қасым-Жомарт Тоқаевтың Моңғолияға мемлекеттік сапары аясында Қазақстан-Моңғолия Іскерлік кеңесінің алғашқы отырысы өтті, деп хабарлайды aqshamnews.kz ҚР ЦДИАӨМ баспасөз қызметіне сілтеме жасап.
Іс-шара барысында екі елдің іскерлік орта мен мемлекеттік құрылым өкілдері бірлескен жұмыстың басым бағыттарын талқылады.
Цифрлық даму министрі Жаслан Мәдиев өз сөзінде инновациялық экожүйені құру, стартап-жобаларды дамыту, цифрлық үкіметті (govtech) енгізу және аэроғарыш саласындағы жобалар бойынша ынтымақтастықты нығайту жөніндегі негізгі бағыттарды атап өтті.
Қазақстан өз кезегінде Astana Hub халықаралық технопаркін дамыту тәжірибесімен бөлісті, оның жұмысы барысында 1500-ден астам резидент, соның ішінде 436 шетелдік компания тартылды. Сонымен қатар, Орталық Еуразиядан шыққан стартаптарды жаһандық нарықтарда қолдауға бағытталған шетелдерде IT-хабтар құрудың табысты тәжірибесі де ұсынылды.
Қазақстандық Jet компаниясының электр скутерлерін жалға беру стартапының Моңғолия нарығына шығуы сәтті болғаны атап өтілді – ол 6 мыңнан астам скутер ұсынды. Сонымен бірге, моңғол стартаптары да Astana Hub акселерациялық бағдарламаларына белсенді қатысып келеді. Мысалы, Fibo Group стартапы технопаркте Google for Startups акселерациялық бағдарламасынан сәтті өтті. Бұл бағдарламаға қатысу стартаптарға халықаралық тәжірибе мен жетекші сарапшылардың қолдауына жол ашады, бұл олардың әрі қарай дамуы мен жаһандық нарықтарға шығуы үшін маңызды қадам саналады.
Ынтымақтастықтың тағы бір маңызды элементі ретінде қазақстандық электрондық үкімет жүйесі eGov экспортын талқылау жүргізілді. Бұл жоба Моңғолияға Қазақстанның мемлекеттік қызметтерді цифрландырудағы жетістіктерін қолдануға мүмкіндік береді, мұнда қызметтердің 90%-дан астамы онлайн режимінде ұсынылады.
Іскерлік кеңестің алғашқы отырысы тұрақты дамуға және заманауи сын-қатерлерді бірлесіп еңсеруге бағытталған стратегиялық серіктестіктің берік негізін қалады.
