Қазақстан мен Гонконг көлік ынтымақтастығын нығайтуда: жаңа жолаушылар рейстері мен жүк тасымалы жоспарлануда
Мемлекет басшысының халықаралық әуе хабтарын дамыту және ішкі әуежайлар арқылы жүк тасымалдау көлемін ұлғайту жөніндегі тапсырмасын орындау аясында Қазақстан Республикасы Көлік вице-министрі Талғат Ластаев бастаған қазақстандық делегация Гонконг халықаралық әуежайында жұмыс сапарымен болды, деп хабарлайды aqshamnews.kz.
Айта кетейік, Гонконг халықаралық әуежайы соңғы 14 жыл бойы жүк айналымы бойынша әлемдегі жетекші әуежай саналып келеді. 2024 жылы бұл көрсеткіш 4,9 млн тоннаға жеткен.
Сапар барысында қазақстандық делегация Гонконг көлік-логистикалық бюросы директорының орынбасары Келвин Маменмен, Гонконг әуежайының бас директоры Вивьен Ченгпен және өңірдің жетекші әуе компаниялары – Hong Kong Airlines, Cathay Pacific және Hong Kong Air Cargo басшыларымен кездесті.
Келіссөздер барысында Гонконг әуе тасымалдаушыларының 5-ші әуе еркіндігін пайдалана отырып, Алматы мен Астана қалаларына жолаушылар рейстерін ашу және Қазақстан мен Гонконг арасындағы жүк тасымалдарын арттыру мәселелері талқыланды. Бұл бастамалар екі ел арасындағы көлік-логистикалық ынтымақтастықты одан әрі тереңдетуге бағытталған.