Қазақстан Испаниядағы артистік жүзуден әлем кубогі кезеңінде екі қола медаль жеңіп алды, – деп хабарлайды aqshamnews.kz тілшісі.
Понтеведра қаласында өткен жарыста қазақстандық Алдияр Рамазанов ерлер арасындағы техникалық бағдарламада үшінші орын иеленді. Ол өнері үшін төрешілерден 223.0833 ұпай алды.
Бірінші орынды италиялық Филиппо Пелати иеленсе, екінші орын испаниялық Энеко Санчес Агиларға бұйырды. Қазақстандық Виктор Друзин бесінші нәтиже көрсетті.
Айта кетейік, бұл Алдияр Рамазановтың осы турнирдегі екінші жүлдесі. Бұған дейін ол Ясмина Исламовамен бірге техникалық бағдарламада қола медаль жеңіп алған болатын.