Еліміздің Сыртқы істер министрлігі қатаң ескертеді, – деп хабарлайды aqshamnews.kz тілшісі.
Таяу Шығыстағы әскери қақтығыстардың шиеленісуіне байланысты еліміздің Сыртқы істер министрлігі жағдай толық тұрақтанғанша төмендегі елдерге барудан уақытша бас тарту керек дейді.
Тізімге енген 14 мемлекет:
Бахрейн, Мысыр, Израиль, Йемен, Иордания, Ирак, Иран, Қатар, Сауд Арабиясы, Кувейт, Ливан, БАӘ, Оман, Сирия.
Не істеу керек?
Жай ғана құлақ асу керек. Себебі министрліктің ескертуіне қарамастан, аталған аймақтарға әлі де сапарлап шығып кетуге әрекет етіп жатқан азаматтар бар екен.
«Аймақтарда жүрген Қазақстан азаматтарын жеке қауіпсіздік шараларын күшейтуге, қауіпті аудандарға бармауға, жергілікті билік органдарының нұсқауын орындауға, соның ішінде зымыран шабуылынан қауіп келген жағдайда дереу баспаналарға/паналау орындарына баруға, сондай-ақ Қазақстан Республикасының шетелдегі мекемелерімен, туроператорлармен және әуе тасымалдаушыларымен тұрақты байланыста болуға шақырамыз», — делінген ресми хабарламада.
Бұл ескертуді жақындарға жіберіп қойған дұрыс. Таяу Шығыстағы көптеген елдің әуе кеңістігі жабық екенін ескеру керек.
Жағдай қаншалықты күрделі?
Аймақта ахуал шегіне жетіп тұр. Президент Қ. Тоқаев Иран аумағынан Біріккен Араб Әмірліктеріне жасалған зымыран мен дрон шабуылдарын қатаң айыптады. Себебі бейбіт тұрғындар қаза тауып, азаматтық нысандар қираған.
Мемлекет басшысы мұндай әрекеттерді ақтауға болмайтынын және кез келген дауды тек дипломатиялық жолмен шешу керек екенін алға тартып отыр.