Хеймиш Полс Атырауда 2017 жылдан бері тұрады.
Ол бос уақытында қазақ халқының руларын зерттейді екен, деп хабарлайды Almaty-akshamy.kz AtyrauPress-ке сілтеме жасап.
Шетелдік Хеймиш Полс қазақтың руларын, этникалық құрамы мен халықтың басқа да ерекшеліктерін жақсы білетін болып шықты. Кіші жүздің барлық руын, оның ішінде 4 тайпа мен 31 ру барын да айтып отыр.
Жергілікті жердегі бірлескен компанияның бірінде қызмет ететін Хеймиш Полс Атырауда 2017 жылдан бері тұрады. Осы уақыт ішінде қазақ халқының салт-дəстүрі мен мəдениеті жайлы көп мағлұмат алған. Бос уақытында қазақ халқының руларын зерттейді екен. Оның айтуынша, https://news.google.com/бұл ақпарат арқылы өзіне жаңалықтар ашыпты.
«Мен бір халықтың руларға қалай бөлінетінін білгім келді. Қазақстанда 200-ден астам ру бар. Қазір мен кіші жүздің руларын ғана жатқа білемін. Жыл сайын əріптестеріммен бірге мен де көктемнің келгенін атап өтуді ұнатамын. Ал, қазақ мəдениетіне тоқталсақ, мені олардың рулары қатты қызықтырады. Уақыт табыла қалса, бəрін үйренуге асығамын», - дейді ол.
Қазақ халқының өз ұлттық киімдерін киіп жүргені оны ерекше қуантады екен. Ол қазақ киімдерінің əсемдігін ерекше атап өтті. Ою-өрнектер көктемнің келуін бейнелейтіндей.
«Бауырсақ пен наурыз көженің дəмін татып көрдім. Қатты ұнады. Өзімнің ұлттық киімім бар. Оны арнайы мерекелерге киіп жүремін. Ою-өрнектері мен түстері көңіл-күйімді көтереді. Басқалардан мүлдем ерекше. Мұнда адамдар өте мейірімді, қонақжай. Бұл жердің табиғаты да бөлек», - дейді Хеймиш Полс.
Бұдан бөлек, қазақтың ұлттық ойындары мен музыкалық аспаптарын да ұнатады. Ол жақында асық пен лəңгі ойнауды үйреніпті. Оның пайымдауынша, асық дəлдікті, ұстамдылықты, тапқырлықты дамытып, дұрыс есептеуді үйретеді. Ал, лəңгі ептілікті жетілдіреді.
«Ұлттық ойындарды маған кенже ұлым үйретті. Ол Атырауда оқып жүріп үйреніп алған. Сондай-ақ, 15 жастағы ұлым домбыра тарта алады. Қазір алты күйді еркін орындайды. Біздің сүйікті күйлеріміз – «Адай» мен «Балбырауын». Менің түсінгенімдей, бұл – Атыраудағы ең танымал шығармалар», - дейді Х.Полс.