Қазақстандық 10 жастағы модель Алтынай Баймұратова Бангкокта өткен халықаралық «Kids Star International 2025» сұлулық және талант байқауында Гран-при иеленді, деп хабарлайды Aqshamnews.kz тілшісі.
Байқау Таиланд астанасы Бангкок қаласында 2025 жылғы 1-7 желтоқсан аралығында өтті. Оған Болгария, Үндістан, Ресей, Филиппин, Таиланд, Тайвань, Малайзия, Лаос, Индонезия, Мьянма, Аустралия және өзге де елдердің өкілдері қатысты.
Бір аптаға созылған додада Алтынай бірнеше кезең бойынша өнер көрсетті. Ол таланттар байқауында қазақ тілінде патриоттық ән орындап, дефиледе бақ сынады. Сонымен қатар «Үздік Disney киімі», «Үздік жағажай образы», «Үздік отбасы», «Мисс және Мистер Достық» аталымдары бойынша да қатысқан. Қатысушылар арасында ең фотогенді және ең әртіс үміткерлер де анықталған.
Жоба аясында Алтынай анасымен және өзге қатысушылармен бірге Бангкоктағы балалар үйіне барып, ата-ана қамқорлығынсыз қалған балаларға көмек көрсеткен.
Байқаудың финалы 2025 жылғы 7 желтоқсанда өтіп, қорытындысында Алтынай Баймұратова басты жүлде – Гран-приді жеңіп алды. Осылайша Қазақстан аталған ауқымды халықаралық балалар байқауында алғаш рет жеңіске жетті.
Бұдан бөлек, қазақстандық қатысушы Disney желісі бойынша фея Динь-Динь образын сәтті сомдағаны үшін арнайы марапатқа ие болды.
WORLD KIDS BEAUTY ASSOCIATION және MINI MISS MISTER WORLD халықаралық ұйымының Қазақстандағы ұлттық директоры Айжамал Осмонованың айтуынша, жобаның басты мақсаты – жас модельдерді таныту ғана емес, Қазақстанды халықаралық деңгейде таныстыру.