Бішкекте Қазақстан киносының күндері өтіп жатыр, деп хабарлайды aqshamnews.kz
Үш күн бойы көрсетілімдер «Ала-Тоо» кинотеатрында өтеді. 20 тамыз күні сағат 18:00-де көрермендерге Рүстем Әбдрашевтің «Қазақ хандығы. Алтын тақ» фильмі ұсынылады.
Келесі күні, 21 тамызда сағат 14:00-де Ұлттық киноны қолдау орталығының қолдауымен түсірілген Рашид Сүлейменовтің «Операция Набат» картинасы көрсетіледі. Бағдарламаны 22 тамызда сағат 11:00-де режиссер Жандос Құсайыновтың Ұлттық киноны қолдау орталығының қолдауымен түсірілген «Жамбыл. Жаңа дәуір» фильмі қорытындылайды.
Әр көрсетілімнен кейін фильм авторларымен пікірталас ұйымдастырылады. Бұл көрермендерге режиссерлердің шығармашылық ой-тұжырымын тереңірек түсінуге және өздерін қызықтырған сұрақтарын қоюға мүмкіндік береді. Ұйымдастырушылар барлық көрсетілімдердің еркін қолжетімді болатынын ерекше атап өтті.