Бұған азық-түлік тауарларының қымбаттап жатқаны да себеп болған.
Үкімет басшысы азық-түлік бағасына байланысты әкімдіктерді сынға алды, деп хабарлайды Almaty-akshamy.kz
Премьер-министр Әлихан Смайылов мемлекеттік органдар Қазақстанда инфляцияны тежеу үшін жеткілікті шаралар қабылдамай отырғанын айтты.
Смайыловтың айтуынша, оң динамиканы сақтау үшін экономиканы одан әрі әртараптандыру, инвестиция тарту және тұрақты жұмыс орындарын құру бойынша жұмысты жандандыру қажет.
«Аймақ әкімдіктері жоспарланған көрсеткіштерді ұстанып, инвестиция тарту және қолдау жұмыстарын күшейтіп, инвестициялық жобалардың іске асырылу барысына тұрақты мониторинг жүргізіп отыруы керек. Сондай-ақ, бағаның өсуін тежеуге баса назар аудару қажет», - деді Смайылов.
Сонымен қатар, Үкімет басшысы қазанда инфляция үдеп кеткенін атап өтті.
«Бұл үдеріске ең үлкен үлес - азық-түлік тауарларының қымбаттап жатқанынан. Бұл, ең алдымен, әкімдіктер тарапынан қабылданып жатқан шаралардың жеткіліксіздігін көрсетеді. Өңірлер жыл аяғына дейін жоспарланған әлеуметтік-экономикалық даму көрсеткіштеріне қолжеткізіп, Мемлекет басшысы алға қойған міндеттердің тиімді орындалуын қамтамасыз етуі қажет. Жылдың аяқталуына екі айдан аз уақыт қалды. Барлық жобаларды аяқтап, жоспарларды жүзеге асыруға, бюджетті тиімді пайдалануға күш салуымыз керек», - деді Премьер-министр.