Президент One Water саммитіне қатысу үшін Сауд Арабиясына жұмыс сапарымен келді. Халықаралық форум Қазақстан мен Францияның төрағалығымен, Сауд Арабиясы және Дүниежүзілік банк тобының қолдауымен өтеді, деп хабарлайды aqshamnews.kz
One Water саммиті Біріккен Ұлттар Ұйымының Шөлейттенуге қарсы күрес жөніндегі конвенциясының (UNCCD) 16-шы тараптар конференциясының (COP16) аясында ұйымдастырылады. Саммит Қазақстан мен Францияның төрағалығымен, сондай-ақ Сауд Арабиясы мен Дүниежүзілік банктің қолдауымен өтеді.
Саммиттің басты мақсаты – Тұрақты даму мақсаттарының 6-шы тармағы (таза су және санитария) бойынша әрекеттерді жеделдету және 2026 жылы өтетін келесі БҰҰ Су конференциясына дайындық барысында инновациялық шешімдерді дамыту болды. Іс-шара барысында трансшекаралық ынтымақтастықты нығайту, техникалық шешімдерді зерттеу және су секторындағы жаһандық қаржыландыру тапшылығын жою жолдары талқыланады.
One Water саммиті мемлекеттер, халықаралық ұйымдар, жергілікті билік органдары, даму және жеке банктер, бизнес, филантроптар, ғылыми сарапшылар, үкіметтік емес ұйымдар мен азаматтық қоғам арасындағы серіктестіктерді ынталандыру арқылы су мәселелерін шешуге бағытталған жобаларды кеңейтуге ұмтылады.
Бұл саммит су ресурстарын басқарудағы жаһандық ынтымақтастықты күшейтуге және суға байланысты мәселелерді шешуде нақты нәтижелерге қол жеткізуге ықпал етеді.
akorda.kz