Бурабайда өтіп жатқан Ұлттық құрылтайда Мемлекет басшысы Қасым-Жомарт Тоқаев салық реформасы мен әлеуметтік саланы қаржыландыру мәселелеріне қатысты пікір білдірді, деп хабарлайды aqshamnews.kz
«Үкімет салық реформасына қатысты жаңа тәсілдерді ұсынды. Бұл шаралар, жалпы алғанда, дұрыс. Онда негізгі экономикалық және әлеуметтік факторлар ескерілген», – деді Президент.
Қасым-Жомарт Тоқаев сондай-ақ қосымша құн салығының мөлшерлемесін көтеру қажеттігіне қоғамда түсіністік барын атап өтті.
«Кәсіби мамандар да, жалпы жұртшылық та қосымша құн салығының мөлшерлемесін көтеру қажеттігіне түсіністікпен қарайды. Дегенмен ұсынылған шараларға, соның ішінде, қосымша құн салығына қатысты сын-пікірлер де естіліп қалады. Бірақ мұндай пайым шынайы ахуалға негізделмеген», – деп түсіндірді Президент.
Мемлекет басшысы Қазақстанның әлеуметтік мемлекет екенін және бюджет қаржысының жартысынан көбі әлеуметтік саланың еншісінде екенін атап өтті.
«Біздің еліміз – әлеуметтік мемлекет. Сондықтан білім беру, денсаулық сақтау салаларына инвестиция салуды жалғастырамыз. Бұл – біздің конституциялық міндетіміз», – деді ол.
Алайда, Президент шын мұқтаж азаматтарға ғана көмек көрсетілуі керек екенін атап өтті.
«Қызметін асыра пайдалануға, алаяқтыққа жол берілмейді. Сондықтан басымдық берілмеген жобаларға бөлінетін қаржы азаяды. Бұл қажет шара екені айдан анық», – деп қосты Қасым-Жомарт Тоқаев.
Президент Үкіметке осы жылдың соңына дейін әлеуметтік саланы қаржыландыруды оңтайландыру жолдарын нақты анықтауды тапсырды.