Қаржылық мониторинг агенттігі заңсыз берілген несие схемаларын анықтау бойынша жұмыс жүргізіп жатқанын мәлімдеді. Алматы қаласы бойынша департаменті 6 микроқаржы ұйымының заңсыз әрекеттерін әшкереледі, деп хабарлайды aqshamnews.kz.
Атап айтқанда, Creditum МҚҰ, Sofi Finance МҚҰ, Hava Finance МҚҰ, SF Offline МҚҰ, POS Credit МҚҰ және «Сәлем Кредит» МҚҰ басшылығына қатысты алаяқтық және заңсыз кәсіпкерлік қызмет бойынша тергеу амалдары жүргізілуде.
Бұл микроқаржы ұйымдары төлемдері кешіктірілген қарыз алушыларды «KOKE.KZ», «TENGO.KZ», «HAVA.KZ» платформалары арқылы серіктес компаниялармен кепілдік шарттарын жасауға мәжбүрлеген. Бұл жағдайда кепіл берушінің жауапкершілігі тек қарыз алушы қайтыс болған кезде ғана күшіне енген. Қарыз алушылардан бастапқы несие сомасынан бірнеше есе көп төлемдер алынған, бұл азаматтарды қарызға батыруға әкеп соққан.
Мысалы, бір қарыз алушы Ш. 120 мың теңге несие алып, негізгі қарыз бен пайыздарды қоспағанда тек кепілдік үшін 446 мың теңге төлеген.
Тергеу амалдары жалғасуда. Егер сіз осы сияқты заңсыз фактілер туралы ақпарат білсеңіз, «АФМ Insider» телеграм-ботына (@afm_insider_bot) хабарласа аласыз. Қаржылық мониторинг агенттігі анонимділікке кепілдік беретінін мәлімдеді.