Полиция департаментінің бастығы жас батырға алғыс білдірді, деп хабарлайды aqshamnews.kz тілшісі.
Қарағанды облысының бас полицейі Негмет Исмагулов суға батып бара жатқан төрт жасар баланы құтқарып қалған 13 жастағы Нұралы Әлханды қабылдап, жасөспірімге ерлігі үшін алғыс білдірді.
Оқиға тамыз айының басында Бұқар жырау ауданындағы Семізбұғы көлінде болған. Суда ойнап жүрген төрт жасар бала мінген үрмелі матрас желдің әсерінен аударылып, бала суға құлап кеткен. Сол сәтте жағалауда болған 9-сынып оқушысы Нұралы Әлхан ойланбастан көмекке ұмтылып, баланы судан аман алып қалған.
Жасөспірімнің ерлігі туралы әлеуметтік желіден білген Қарағанды облысының полиция департаментінің бастығы Негмет Исмагулов Нұралыны арнайы қабылдап, оның анасына да ризашылығын білдірді.
– Балаңыздың ерлігі туралы әлеуметтік желіден оқып, ерекше риза болдым. Сын сағатта тайсалмай, төрт жасар баланың өмірін құтқарған Нұралының батылдығы көпке үлгі. Осындай ержүрек азамат тәрбиелеп отырған ата-анасына алғысымды білдіремін. Балаларыңыздың болашағы жарқын болсын, – деді ПД бастығы.
Кездесу барысында Негмет Исмагулов алты баланы тәрбиелеп отырған Нұралының анасы Самал Абдрахмановаға алғыс хат табыстады.
– Сол сәтті қайта еске алудың өзі қиын. Анасы ретінде балам үшін алғашында қатты қорықтым. Бірақ оның баланы судан аман алып шыққанын естігенде, бойымды мақтаныш сезімі кернеді. Ұлымның ерлігін ескеріп, құрмет көрсеткен полиция департаментінің басшылығына алғысымды білдіремін, – деді Самал Абдрахманова.
Ал Нұралы үшін бұл оқиға – марапатқа емес, адам өмірін құтқаруға қатысты қабылданған шешім.
– Барлығы күтпеген жерден болды. Бала алғашында үрмелі матраспен жүзіп бара жатқан. Кейін желден матрас аударылып, ол суға құлап кетті. Сол сәтте менің ойымда оны қалай да құтқару ғана болды. Менің бес бауырым бар. Балаға қараған кезде өз бауырларымды елестеттім. Сондықтан оны аман алып қалу үшін бар күшімді салдым. Мұндай марапат аламын деп ойлаған жоқпын, – дейді Нұралы Әлхан.
Жасөспірімнің батылдығына тәнті болған Негмет Исмагулов Нұралыға Қазақстан Республикасы Ішкі істер министрлігінің нышаны бейнеленген қолсағат табыс етті. Сонымен қатар оның бауырларына да сый-сияпат жасап, жас батырдың болашақта елге адал қызмет етіп, Заң мен тәртіпті құрметтейтін азамат болуына тілектестігін білдірді.
Нұралының әрекеті – азаматтық батылдықтың, жанашырлықтың және адам өміріне деген жауапкершіліктің жарқын үлгісі. Сын сағатта өз қауіпсіздігін ойламай, өзгенің баласын құтқаруға ұмтылған жасөспірімнің ерлігі көпке үлгі болары сөзсіз.