Премьер-министр Олжас Бектенов 2025 жылғы 25 сәуірдегі № 68 қандас мәртебесін беру тетігін өзгерту бойынша ұсыныстар әзірлеу үшін жұмыс тобын құру туралы өкімге қол қойды, деп хабарлайды aqshamnews.kz
Қандас мәртебесін беру тетігіне заңнамалық түзетулер енгізу жөнінде ұсыныстар әзірлеу үшін жұмыс тобының құрамы бекітілді.
- Осы өкімге қосымшаға сәйкес құрамда қандас мәртебесін беру тетігіне заңнамалық түзетулер енгізу жөніндегі ұсыныстар әзірлеу үшін жұмыс тобы құрылсын. Жұмыс тобы 2025 жылғы 30 мамырға дейін мерзімге қандас мәртебесін беру тәртібін қайта қарау бойынша заңнамалық түзетулер әзірлесін және оларды Қазақстан Республикасының Үкіметі аппаратына енгізсін, - делінген мәтінде.
Оның орындалуын бақылау және жетекшілік ету Премьер-министрдің орынбасары Ермек Көшербаевқа жүктелді.
Қандас мәртебесін беру тетігіне заңнамалық түзетулер енгізу жөніндегі ұсыныстар әзірлейтін жұмыс тобының құрамы:
ҚР Премьер-министрінің орынбасары, басшысы;
ҚР Еңбек және халықты әлеуметтік қорғау вице-министрі, басшының орынбасары;
ҚР Еңбек және халықты әлеуметтік қорғау министрлігі Көші-қон комитетінің төрағасы, хатшы;
ҚР Ұлттық қауіпсіздік комитеті төрағасының орынбасары (келісім бойынша);
ҚР Әділет вице-министрі;
ҚР Ғылым және жоғары білім вице-министрі;
ҚР Денсаулық сақтау вице-министрі;
ҚР Мәдениет және ақпарат вице-министрі;
ҚР Білім вице-министрі;
ҚР Сыртқы істер министрінің орынбасары;
ҚР Ұлттық экономика вице-министрі;
ҚР цифрлық даму, инновациялар және аэроғарыш өнеркәсібі вице-министрі;
ҚР Ішкі істер министрінің орынбасары;
ҚР Үкіметі Аппаратының Әлеуметтік даму бөлімінің меңгерушісі;
облыстар, республикалық маңызы бар қалалар, астана әкімдерінің орынбасарлары.
Жұмыс тобына 2025 жылғы 30 мамырға дейінгі мерзімде қандас мәртебесін беру тәртібін қайта қарау бойынша заңнамалық түзетулер әзірлеп, оларды ҚР Үкіметінің Аппаратына енгізу тапсырылды.
А Н Ы Қ Т А М А:
Қандас – бұрын Қазақстан Республикасының азаматтығында болмаған, тарихи отанына келген және тиісті мәртебе алған этникалық қазақ және оның ұлты қазақ отбасы мүшелері.
Биыл 3,2 мыңнан аса этникалық қазақ қандас мәртебесін алды. Еңбек және халықты әлеуметтік қорғау министрінің бұйрығымен қандастар мен қоныс аударушыларды қабылдаудың 2025 жылға арналған өңірлік квотасы 9653 адам деп белгіленді.