Қалалық кардиология орталығында Servier компаниясымен бірлесіп, Дүниежүзілік емге бейімділік күніне орай дөңгелек үстел өтті, – деп хабарлайды aqshamnews.kz тілшісі.
Іс-шараға дәрігерлер, денсаулық сақтау саласының сарапшылары және медицина қауымдастығы өкілдері қатысты. Кездесудің негізгі тақырыбы — қазіргі медицинаның өзекті мәселелерінің бірі, яғни науқастардың тағайындалған емге бейімділігі төмендігі болды.
Мамандардың айтуынша, созылмалы ауруға шалдыққан науқастардың шамамен жартысы дәрігердің ұсынымдарын толық сақтамайды. Бұл емнің тиімділігін төмендетіп, денсаулықтың нашарлауына, аурудың асқынуына және ауруханаға жату жағдайының көбеюіне әкеледі.
Іс-шараны медициналық бөлім бойынша директордың орынбасары Аргүл Разбекова мен ұйымдастыру-әдістемелік жұмыс жөніндегі директордың орынбасары Жанар Нұрбай құттықтау сөзбен ашты.
Дөңгелек үстел барысында жүрек-қантамыр ауруларын диагностикалау мен емдеудің заманауи тәсілдері, тиімді терапияны таңдау, артериялық гипертензиясы бар науқастарды жүргізу, сондай-ақ жекелендірілген тәсіл мен «смарт-терапияны» енгізу мәселелері талқыланды. Спикерлер қатарында Аргүл Разбекова, кардиолог дәрігер Динара Амангелдинова, Жанар Нұрбай, кардиология бөлімшесінің меңгерушісі Назира Апиева және кардиолог дәрігер Гүлмира Әмренова болды.
Сарапшылар емге бейімділік тиімді терапияның негізгі шарты екенін атап өтті. Олардың пікірінше, тіпті ең заманауи емдеу әдістері мен дәрілік препараттар да дәрігер ұсынымдары сақталмаған жағдайда тиісті нәтиже бермейді.
Талқылау барысында емге бейімділіктің төмен болу себептері де қарастырылды. Олардың қатарында науқастардың ақпараттану деңгейінің жеткіліксіздігі, емдеу сызбаларының күрделілігі және дәрілерді тұрақты қабылдаудың маңызын толық түсінбеу бар. Кездесу қорытындысы бойынша қатысушылар науқастардың денсаулығына жауапкершілігін арттыруға бағытталған бірқатар практикалық ұсыныс айтты. Атап айтқанда, ақпараттық-түсіндіру жұмыстарын күшейту және цифрлық құралдарды кеңінен енгізу қажеттігі қозғалды.