Мамандар оқиғаның себебін анықтап жатыр
Алматы қаласының әкімі Бақытжан Сағынтаев 19 маусымда цирк ғимаратының жанында болған оқыс оқиғаға қатысты пікір білдірді, деп хабарлайды Almaty.tv.
Қала әкімі бұл туралы Twitter-дегі парақшасында жазды.
«Цирктегі субұрқақта қыздарға және біреуінің анасына қатысты орын алған қайғылы оқиға полицияның тергеуінде. Мұндай жағдай болмау керек. Зардап шеккендердің тезірек сауығып кетуіне тілектеспін», – деп жазды Б. Сағынтаев.
Естеріңізге сала кетейік, 19 маусымда сағат 15-16 шамасында Қазақ мемлекеттік циркінің жанындағы субұрқақта электр тогының соғуынан үш адам зардап шеккен болатын. Әкімдікте мамандар оқиғаның себебін анықтап жатқанын атап өтті.
