Желіде тағы бір торт дауы пайда болды. Ақтөбелік кондитер "Қайратқа" футбол клубына арнап торт жасады. Ақтөбелік футбол жанкүйерлері бұған наразылығын танытты, - деп хабарлайды Аqshamnews.kz тілшісі.
Ақтөбелік кондитер Самал Асанова алматылық команданың Чемпиондар лигасына шығуына орай торт пісіріп, әлеуметтік желіде сынға ұшырады.
Ол торт әзірлеу барысын видеоға түсіріп жариялаған. Кейін ақтөбелік жанкүйерлер оған бойкот жариялады.
"Ақтөбеде футбол бұл жай ғана ойын емес, ол - ақтөбеліктің ажырамас бөлігі. Ақтөбеден шыққан кәсіпкердің мұндай әрекеті орынсыз әрі лайықсыз деп санаймыз. Біз өз ұстанымымызды өткінші хайпқа айырбастамаймыз!" - деп жазған футбол жанкүйерлері.
Кондитер футболдан хабары жоғын, бар болғаны қазақстандық спортшыларды қолдағанын айтты.
"Жігіттер видеоны өшірдім. Сіздерге футболдан хабарым жоғын, тек елімізден шыққанға қолдау ретінде жасағанымды мың рет айттым. Менде әр түрлі тақырыпта контенттер түсіріледі. Ертең "Ақтөбеге" арнап күшті торт жасаймын. Бір болмайтын дүниеден өз қаламыздың масқарасын шығармайықшы және мені балағаттаудың қажеті жоқ. Ана, әпке, қарындастарыңыз бар шығар. Мен - жалғызбасты анамын, осы үлкен кәсіпті нөлден бастап көтеріп, еңбек етіп келемін. Қаншама ұйқысыз түндер өтті?! Тек Ақтөбенің өзінде 550 адам жұмыс жасайды, басқа қалаларды қоспағанда. Қаншама жастарды қолдаған проекттерім бар. Менің бір әке, көкем жоқ. Таза еңбек! Бар болса ешқашан аяған емеспін. Админ осында ушықтырмай, неге жекеме жазбадыңыз, түсіндіріп. Кішкене шалыс бассаң, әрі қарай шалдырудың қажеті жоқ. Жекеге де енді ғана жазып жатыр, барымша түсіндіргендей болдым. Бәріңізге сәттілік", -деді кондитер.
Еске салайық, бұған дейін әлеуметтік желіде кондитер мен блогердің дауы қызды. Блогер туған күніне тапсырыс берген тортты кондитер 600 мың теңгеге бағалаған. Заңгердің айтуынша, баға мереке күні ғана айтылған. Алайда торт құны әлі төленбеген. Кондитер Нұршат Ақбергенова блогерді сотқа беретінін айтты.