Алматының «Қайрат» клубы Санкт-Петербургте өткен жолдастық кездесуде ресейлік «Зенитке» 0:2 есебімен жол берді, деп хабарлайды Aqshamnews.kz тілшісі.
Матч барысында алаң иелері ойын тізгінін ерте қолға алды. Алдымен Нино стандартты жағдайдан кейін есеп ашса, артынша Александр Соболев әдемі комбинацияны голмен түйіндеді. Осылайша, «Зенит» өз алаңында сенімді жеңіске жетті.
«Қайрат» ойынды Буч, Кургин, Африка, Мартынович, Қасаболат, Нұрғалиев, Садыбеков, Глазер, Луиш Мата, Себальос және Эдмилсонмен бастады. Бірінші таймда ресейлік клуб бірнеше қауіпті шабуыл ұйымдастырып, есепті ұлғайтуға да жақын болды. Бірнеше сәтте алматылықтарды қақпа бағаны мен қақпа жақтауы құтқарып қалды.
Екінші таймда ойын қарқыны сәл бәсеңдегенімен, «Зенит» допқа иелік етудегі басымдығын сақтап, матчты толық бақылауда ұстады. Ал «Қайрат» шабуылда айтарлықтай өткірлік таныта алмады.
Айта кетейік, соңғы сегіз жылда бұл екі команда бес рет жолдастық матч өткізген. Соның төртеуінде «Зенит» жеңіске жетсе, бір кездесу тең аяқталған. Алматылық клуб бұл қарсыласын әзірге ұта алған жоқ.
Енді Қазақстан Премьер-лигасының келесі турында «Қайрат» 5 сәуір күні өз алаңында «Астананы» қабылдайды.