Бүгін, 9 желтоқсанда, Астанада Чемпиондар лигасының жалпы кезеңінің алтыншы турындағы матч өтеді. Онда алматылық "Қайрат" пен Пирейдің "Олимпиакосы" кездеседі, - деп хабарлайды aqshamnews.kz тілшісі.
Матчті қашан және қайдан көруге болады?
Кездесу Астана уақытымен 20:30-да басталады. Ойынды тікелей эфирде Qazaqstan телеарнасы көрсетеді. Сондай-ақ матчті арнаның ресми сайтынан да тамашалауға болады.
Матчтің бас төрешісі болып испаниялық Хуан Мартинес тағайындалды. Оған қапталдағы көмекшілері Рауль Кабаньеро мен Иньиго Прието жәрдемдеседі. Төртінші төреші міндетін Хавьер Альберола атқарады. VAR жүйесіне Карлос дель Серро жауап береді, оның ассистенті – Хавьер Иглесиас Вильянуэва.
ЧЛ-дағы матч алдындағы командалардың жағдайы
"Сары-қаралардың" қоржынында бір ұпай болса, грек клубында екі ұпай бар. Чемпиондар лигасының негізгі кезеңінде алматылықтар Кипрдің "Пафосымен" (0:0) тең ойнап, Лиссабонның "Спортингінен" (1:4), Мадридтің "Реалынан" (0:5), Миланның "Интерінен" (1:2) және Данияның "Копенгагенінен" (2:3) жеңілген.
Жалпы турнирлік кестеде "Қайрат" 35-орында, ал "Олимпиакос" 33-сатыда тұр.