2024 жылдың көктемгі су тасқыны кезінде ерлік көрсеткен ит Пшонның есімі мәңгі есте қалды. Бұл ит су тасқыны кезінде дамбаларды нығайтуға көмектесіп, көптеген адамдардың жүрегінде орын тапқан.
Пшон 2024 жылдың 28 қарашасында қаза болды. Сол күні ветеринарға ауыл тұрғынынан иттердің тобы үйіне кіруге кедергі жасап жатқаны туралы шағым түскен. Ұйықтататын дәріден соң Пшон өзен жағасында қаза болған.
Иттің құрметіне арналған ескерткішті жасауға Атыраулық мүсінші Азамат Кенжегалиев шамамен бір ай уақыт жұмсады. Ескерткіш қара металдан жасалып, алтын түсті қаптамамен безендірілген. Онда иттің ерлігі мен әлеуметтік желі қолданушыларының қолдауын бейнелейтін жүрекшелер бейнеленген.
Ескерткіштің артқы жағында шағын дамба орналасқан, бұл Пшонның су тасқынымен күрестегі рөлін еске салады. Мүсінші бастапқыда ескерткішті өзен жағасына орнатуды ұсынған, алайда жергілікті билік бұл бастаманы қолдамаған.
Ескерткішті қалалық кафенің кіреберісіне орнатты. Кафе иесі өз әрекеті арқылы адал және ержүрек иттің жасаған жақсылығына алғысын білдірді.