Әнші Баянсұлу әлеуметтік желіде оқырмандарының сұрақтарына жауап беріп, продюсерімен жұмысын тоқтатқанын және YouTube-тағы әндерінің қайта жүктеліп жатқанын мәлімдеді, деп хабарлайды Aqshamnews.kz тілшісі.
Әнші Баянсұлу Instagram парақшасында кейінгі уақытта жиі қойылып жүрген сұрақтарға жауап берді. Оның айтуынша, тыңдармандары “неге жоқ болып кеттің?”, “продюсермен жұмысты тоқтаттың ба?” және “YouTube-тағы әндер неге жоғалып кетті?” деген сұрақтарды көп жолдаған.
Өнер иесі расында продюсерімен жұмысын тоқтатқанын растады. Айтуынша, мұндай шешім қабылдау оңай болмаған.
«Иә, расында да мен продюсермен жұмысты тоқтаттым. Бұл оңай шешім болған жоқ. Бірақ өмір болған соң, жұмыс барысында қиындықтар туындайды. Мен бәрін Алла өзі реттейді деп сенемін», – деп жазды әнші.
Сонымен қатар ол тыңдармандарына жақсы жаңалық та жеткізді. Баянсұлудың айтуынша, бұған дейін YouTube платформасынан алынып тасталған әндері біртіндеп қайта жүктеліп жатыр.
Әнші жанкүйерлерінен көптеген жылы пікір алып жатқанын айтып, кей ата-аналардың балалары оның әндерін сұрап тыңдайтынын жеткізген.
Сөз соңында өнер иесі шығармашылықтан кетпейтінін атап өтті. Оның айтуынша, алдағы уақытта жаңа әндер мен бейнебаяндар жарық көреді.
«Ең бастысы – мен тоқтамаймын. Алда жоспарлар өте көп: жаңа әндер, жаңа клиптер. Уақыты келгенде бәрін сіздермен бөлісемін», – деді Баянсұлу.
Айта кетейік, әншінің «Ауа райы» әні халық арасында кеңінен танымал. Әнге байланысты түрлі видеолар әлеуметтік желілерде тарап, тіпті италиялық Inter Milan футбол клубы мен Никол Пашинян де осы әнмен видео жариялап, көпшіліктің талқысына түскен еді.