Парламент Мәжілісінде ұстамды әрі мықты бірнеше партия болуы керек
Мемлекет басшысы Қасым-Жомарт Тоқаев «Хабар 24» телеарнасына берген сұхбатында еліміздің парламенттік жүйесін реформалау жөніндегі ойын айтты, деп хабарлайды Almaty-akshamy.kz.
Сұхбаты барысында Президент еліміздегі парламенттік жүйені, партиялық жүйені реформалауды шындап ойланып жүргенін және бұл жайында 28 қаңтарда партияның съезінде де айтқанын жеткізді. Осы орайда тиісті қадамдар мемлекет мүддесіне сай жасалуы керек екенін атап өтті.
«Мәжілісте бірнеше мықты партия болуы тиіс. Олар тіпті Үкіметті құруда да тіл табыса білуі керек. Бізге осындай өзгерістермен бірге саяси мәдениет деңгейін көтеріп, саяси тұлғаларды тәрбиелеу қажет. Популизмнен арылу керек. Германияға қараңыздаршы, партиялар ауысып тұрады. Барлығы мәдени түрде өзгереді. Партиялар үкіметтегі лауазымды қызметтерге өз өкілдерін ұсынады. Меніңше, уақыт өте біз осыған келеміз. Ал мұның бәрі мен Президент болып тұрғанда орындалғанын қалаймын», - деді Қазақстан Республикасының Президенті Қасым-Жомарт Тоқаев.
Сонымен Қасым-Жомарт Тоқаев оппозицияның болуына қатысты сұраққа жауап берді.
«Бізде оппозиция бар, алайда көбіне көшеде жүреді», - деді Президент.
Мемлекет басшысының пайымынша, Парламент Мәжілісінде ұстамды әрі мықты бірнеше партия болуы керек. Жалпы, бұл бағытта саяси мәдениетті өсіру аса маңызды.