Бейрут қаласында 9-10 қыркүйек аралығында пара таеквондодан ашық Азия чемпионаты өтті. Жарысқа 14 мемлекеттен 70-тен астам спортшы қатысты.
Қазақстандық спортшылар чемпионатта 1 «алтын» және 4 «қола» медальді еншіледі. Атап айтқанда Салимгереева Марьям (-65 кг) алтыннан алқа тақты. Ал Домбаев Нұрлан (-80 кг), Өміралі Нышан (+80 кг), Кушербаев Бауыржан (-63), Гариполлаев Алишер (+80 кг) қола медальды місе тұтты, деп хабарлайды Almaty-akshamy.kz.
Сондай-ақ, жалпы командалық есепте Қазақстан құрамасы 3-ші орын алса, 1-ші орынға Иран, 2-ші орынға Өзбекстан елдері ие болды.
«Ливанда өткен ашық Азия чемпионат рейтингтік жарыстардың бірі болып келеді. Жарыста спортшылар өз шеберліктерін жақсы көрсете білді. Осындай дәрежедегі жарыста орын алу үлкен жетістік. Қазіргі таңда Нұрлан әлемдік рейтингте 2 орында болса, Нышан 5 орында, Бауыржан мен Алишер 9 орында тұр. Ал, Марьям үздік 20-дан көрінуде», - деді Дене мүмкіндіктері шектеулі тұлғаларға арналған спорттық даярлау орталығының команда басшысы Ерлан Суеуов.