Қазақстан мен Әзербайжан халықаралық аренада табысты ынтымақтастық жүргізуде
Бұл туралы Қазақстан Республикасының Әзербайжандағы Елшісі Әлім Байел мен Әзербайжан Республикасы Президентінің сыртқы саясат мәселелері жөніндегі Көмекшісі Хикмет Гаджиевтің кездесуінде айтылды, деп хабарлайды almaty-akshamy.kz
Кездесуде екіжақты ынтымақтастықтың жоғары қарқыны қанағаттанарлықпен аталып өтті. Тараптар, сондай-ақ, өңірлік және халықаралық күн тәртібіндегі өзекті мәселелерді талқылады. Осы ретте көлік-логистикалық ынтымақтастық пен коммуникациялар тақырыбына ерекше көңіл бөлінді. Сондай-ақ, 2023 жылғы 3 қарашада Астанада өтетін Түркі мемлекеттері ұйымының 10-шы мерейтойлық Саммитінің маңыздылығына назар аударылды.
Әзербайжан Президентінің Көмекшісі бауырлас Қазақстанға көрсетіп отырған қолдауы, екіжақты және көпжақты қарым-қатынастарды дамыту және өңірлік мәселелерді шешу тұрғысындағы сындарлы ұстанымы үшін алғыс айтты. Өз кезегінде, Елші Ә. Байел Қазақстанның аймақта бейбітшілік пен өзара тиімді ынтымақтастықты қолдайтынын атап өтті. Тараптар тұрақты кездесулердің қалыптасқан тәжірибесін жалғастыруға келісті.