Республика күніне орай Нұрғиса Тілендиев атындағы мемориалдық мұражайда «Өз елім» атты мерекелік іс шара өтті.
Концерттің негізгі мақсаты - тұрғындар арасында патриоттық сезімді арттыру. Шара барысында өнерпаздар композитор, халық қаһарманы Н.Тілендиевтің туындыларын орындап, көрерменнің көңілінен шықты.
– Бүгінгі іс шараның негізгі мақсаты - Республика күнін үлкен деңгейде атап өту, Н.Тілендиевтің мемориалдық музейінің бар екенін көрсету, композитордың шығармаларын таныту. Бүгінгі концертте Құрманғазы атындағы консервоторияның студенттері өнер көрсетті. Нұрғиса Тілендиевтің «Құстар әні», «Туған ел» т.б әндері шырқалды. Бұл мемориалдық музей 2014 жылы ашылды. Кез келген адам келіп көре алады. Оқушыларға кіру тегін, – деді Н. Тілендиев атындағы мемориалдық музейінің экскурсоводы Мөлдір Зікірбай.
Әйгілі композитор Нұрғиса Тілендиевтің туындыларын халық сүйіп тыңдайды. Оның шығармашылығын бағалайтын және насихаттайтын адам жетерлік. Солардың бірі Абай атындағы қазақ ұлттық опера және балет театрының стажер солисті Шыңғыс Нұрғалиұлы. Ол ұлы тұлғаның әндеріне деген махаббаты бөлек екенін айта кетті.
– Нұрғиса Тілендиев атамыз әрбіріміздің жүрегімізде деп ойлаймын. Осындай керемет мерекеде осы мұражайға келіп, ол кісінің заттарын көріп шабыттандым. Өте әсерлі сәт деуге болады. Бұндай ұлы тұлғалардың есімі ешқашан өшпейді деген сенімдемін. Әрбір әнінің өзіндік мән мағынасы бар, – деді ол.
Елге деген құрмет пен сүйіспеншілікті дәріптеген бұл концерт көрермендерге рухани азық сыйлап, өнер мен патриотизмнің маңыздылығын ұмытпауға шақырды.