Алматы полициясы ойын-сауық орындарында қауіпсіздікті күшейту қажеттігін мәлімдеді
Алматы қаласының полициясы қылмыс жиі тіркелетін ойын-сауық орындарын анықтап, олардың қауіпсіздік шараларын күшейту қажеттігін атап өтті.
Ішкі істер министрі жариялаған профилактика жылы аясында Әуезов ауданында ойын-сауық мекемелеріндегі қауіпсіздік мәселесі бойынша арнайы жиын өтті. Жиынға аудандық полиция басқармасының, төтенше жағдайлар департаменті мен санитарлық-эпидемиологиялық қызмет мамандары, сондай-ақ бар, мейрамхана және түнгі клуб иелері қатысты.
Әуезов аудандық полиция басқармасының бастығы Данияр Меңдебаевтың айтуынша, аудандағы 65 ойын-сауық мекемесінің 16-сында бұзақылық пен төбелес жиі тіркеледі. Өткен жылы осы орындарда 61 қылмыс жасалған.
Меңдебаев атап өткендей, көптеген ойын-сауық орындары күзет ұйымдарының қызметіне тиісті лицензиясы жоқ, ал күзетшілер жанжалдарды тоқтатудың орнына, келушілерді ғимараттан шығарып жіберумен ғана шектеледі. Бұл жағдай қылмыстың көбеюіне әкеп соғады.
Комиссия отырысының қорытындысы бойынша, ойын-сауық орындарында қылмыстың алдын алу шараларын күшейту туралы шешім қабылданды. Сонымен қатар, есірткі саудасының алдын алу жұмыстары басты назарға алынып, мекеме иелеріне нақты міндеттер жүктелді.
Ойын-сауық мекемелерінің иелеріне:
- Лицензиясы бар кәсіби күзет қызметін қолдану;
- Бейнебақылау камераларын орнату және олардың санын арттыру;
- Қақтығыс жағдайларын азайту үшін қосымша қауіпсіздік шараларын қарастыру міндеттелді.
Алматы қаласының құқық қорғау органдары қауіпсіздік ережелерін бұзған ойын-сауық орындарына қатаң шаралар қолданатынын ескертті.