Өткен жылы Алматы музейлерін тамашалауға шамамен 310 мың адам келген

Ал билеттер сатылымынан 85,5 млн теңге табыс түсті. Бұл - қала тұрғындары мен қонақтарының мәдени мұраға деген қызығушылығы артқанын, музейлердің қызмет көрсету сапасы жақсарғанын дәлелдейтін рекордтық көрсеткіш, деп хабарлайды aqshamnews.kz

2024 жылдан бері оқушылар қалалық музейлерге тегін кіретінін ерекше атап өткім келеді. Бұл мүмкіндікті ата-аналар ғана емес, мұғалімдер де тиімді пайдаланып, балаларды экскурсияларға апарып жүр. Былтыр 85 мың оқушы тарихи жәдігерлер мен өнер туындыларын гидтердің жетекшілігімен зерттеп, танысты. Олар осы мүмкіндік арқылы мәдениет пен өнерді, тарихты терең түсіне бастайды. Балаларыңызбен бірге музейлерге баруды әдетке айналдырыңыздар.

Қала әкімі Ерболат Асқарбекұлы музей ісінің және музей қызметкерлерінің жан-жақты дамуына үлкен назар аударып, қолдау көрсетіп келеді.

Біздің мамандар әлемнің үздік мәдени ошақтарында кәсіби дағдыларын жетілдіріп, білім алып жатыр. Оқып-үйренгенін қала музейлерінде енгізіп, қызмет көрсету сапасын арттыру үшін аянбай еңбек етуде. Әкімдік бастамасымен қызметкерлердің айлығы 30%-ға өсіп, соңғы бірнеше жылда 30 маман баспаналы болды.

Былтыр әріптестеріміз 80-нен астам көрме өткізді, жүздеген мәдени іс-шара ұйымдастырып, мәдени астанамыздың дамуына атсалысып жүр.

Биыл бірнеше музей құрылысы бойынша құжаттамалар әзірленеді. Одан бөлек, Алматы аумағында сақталған ерте темір ғасырының жалғыз ескерткіші – Боралдай сақ қорғандарын геосканерлеу жұмыстары бойынша ауқымды жұмыс атқарып жатырмыз. Жуырда музей ісін дамыту бойынша жақсы жаңалықтармен бөлісетін боламыз.