2026 жылғы 18 мамыр мен 08 маусым аралығында Қазақстан Республикасының аумағында «Отбасындағы зорлық-зомбылықсыз Қазақстан» республикалық акциясы өткізілуде, – деп хабарлайды aqshamnews.kz тілшісі.
Аталған кең көлемді іс-шараның басты мақсаты – қоғамдағы отбасылық құндылықтарды нығайту, тұрмыстық зорлық-зомбылықтың алдын алу, азаматтардың құқықтық сауаттылығын арттыру және әрбір отбасының қауіпсіздігін қамтамасыз ету.
Қазіргі таңда отбасындағы тұрақтылық пен өзара сыйластық – қоғамның берік негіздерінің бірі. Дегенмен тұрмыстық жанжалдар мен отбасылық құқық бұзушылықтар әлі де өзекті мәселелердің қатарында қалып отыр. Осыған байланысты акция аясында полиция қызметкерлері профилактикалық жұмыстарды күшейтіп, халықпен тығыз байланыс орнатуда. Әкімшілік аумақтарда үй-үйді және аулаларды аралау жұмыстары жүргізіліп, қиын өмірлік жағдайға тап болған отбасыларды анықтау бағытында кешенді шаралар қолға алынуда.
Профилактикалық іс-шаралар барысында тұрғындармен түсіндіру әңгімелері өткізіліп, отбасындағы татулықты сақтау, кәмелетке толмағандардың қауіпсіздігін қамтамасыз ету, тұрмыстық жанжалдардың алдын алу және құқық бұзушылықтарға жол бермеу мәселелері кеңінен түсіндірілуде. Сонымен қатар, азаматтарға қолданыстағы заң талаптары, дағдарыс орталықтарының қызметі және уәкілетті органдардың көмегіне жүгіну тәртібі жөнінде ақпарат берілуде.
Мамандардың пікірінше, мұндай профилактикалық шаралар қоғамдағы құқық бұзушылықтардың алдын алып қана қоймай, азаматтардың құқықтық мәдениетін қалыптастыруға, отбасылық жауапкершілікті арттыруға және әлеуметтік қолдауды қажет ететін жандарды дер кезінде анықтауға мүмкіндік береді. Әсіресе, қиын өмірлік жағдайдағы отбасыларды ерте кезеңде анықтау олардың өмірлік жағдайын тұрақтандыруға және әлеуметтік-психологиялық қолдау көрсетуге жол ашады.
Акция аясында полиция қызметкерлері азаматтарды тұрмыстық зорлық-зомбылық фактілеріне бейжай қарамауға шақырады. Себебі әрбір отбасының амандығы мен тыныштығы – қоғам тұрақтылығының кепілі. Кез келген құқыққа қарсы әрекеттің алдын алу, зардап шеккен азаматтарға уақытылы көмек көрсету және олардың құқықтарын қорғау – бүгінгі күннің маңызды міндеттерінің бірі.
Айта кету керек, «Отбасындағы зорлық-зомбылықсыз Қазақстан» республикалық акциясы аясындағы жұмыстар алдағы уақытта да жүйелі түрде жалғасып, қоғамдағы қауіпсіздік пен отбасылық құндылықтарды нығайтуға өз үлесін қоса бермек.