Алматы қаласындағы Орталық армияшылар үйінде Ұлы Отан соғысындағы Жеңістің 80 жылдығына арналған "Отан даусы" атты әскери-патриоттық ән-би байқауы өтті. Бұл шараға қала мектептерінің оқушылары қатысып, өз өнерлерін ортаға салды.
Шара салтанатты түрде Қазақстанның Әнұранымен ашылып, "Кербез гүлдер" бишілер тобының "Қазағым-ау" биімен жалғасты. Байқаудың маңыздылығы туралы ҚР Қарулы Күштері Әскери-патриоттық орталығы басшысының орынбасары, генерал Иван Панфиловтың жиен-немересі Алуа Байқадамова атап өтті:
"Ұлы Отан соғысындағы Жеңістің жақындауына қазақстандықтардың қосқан үлесі өлшеусіз. Бұл байқау жастарға ерлікті насихаттаудың және отансүйгіштік сезімді ұялатудың бір жолы."
Алуа Байқадамова байқаудың әділқазылар алқасының төрайымы болды. Оның құрамында әнші Айжан Нұрмағамбетова, скрипкашы Жәмила Серкебаева және хореограф Низам Кәрімов секілді өнер шеберлері бар.
Алматы қалалық Білім басқармасы Дене тәрбиесі және спорт оқу-практикалық орталығының директоры Бақтияр Елемесов:
"Байқаудың мақсаты – жас өнерпаздарды анықтау ғана емес, олардың бойында отаншылдық рухты қалыптастыру," – деп бөлісті.
Байқау барысында оқушылар өздерінің ерекше қабілеттерімен көзге түсіп, әсерлі әндер мен би қойылымдарын ұсынды. Жеңімпаздар дипломдармен марапатталды.
