Бүгін, Абай күніне орай Алматыдағы А.П.Чехов атаындағы Орталық қалалық кітапханада талқы отырысы өтті, деп хабарлайды almaty-aqshamy.kz. Іс-шарада Абай шығармалары, рухани мұрасы талқыланды.
Алматы Кітапханалары және Алматы қаласы Қазақстан халқы Ассамблеясының аналар кеңесімен бірлесіп өткізген шарасы «Ұлы Абай халық жүрегінде» деп аталды.
Алматы Кітапханалары бірлестігінің Жалпы мәселелер және цифрландыру жөніндегі директорының орынбасары Жандос Жамбылұлы шараның бастау сөзін сөйледі. Ол Абай күнінің мереке ретінде аталуының өзі ұлы ақынның шығармашылығы мен рухани мұрасына деген халқымыздың құрметі екенін атап өтті.
Бұдан кейін Абай шығармаларын орыс тіліне аударған аудармашылардың бірі, белгілі ақын Бақытжан Қанапиянов сөз алды. Ол сөзінде Абай шығармаларындағы адамзатқа ортақ ізгі құндылықтардың қай тілдегі оқырмандар үшін де жат еместігін баса айтып өтті.
Чехов атындағы орталық кітапханада өткен шара Абай шығармаларын, рухани мұрасын зерттеу, жас ұрпаққа Абай танымы мен гуманистік идеяларын сіңіруді басты мақсат етті. Бұған қоса, түрлі ұлттар мен этностарды қауымдастырған мемлекеттегі ұлттық бірегейлікті сақтаудың маңыздылығын тануға да бағытталған.
Абай күніндегі айтулы шарада ұлы тұлғаның шығармашылығын арқау еткен жас жеткіншектер өз өнерін көрсетті. Жас өнерпаздардың мерекелік қойылымдары шараның мәдени бояуын аша түсті.