Абай облысындағы алапат орман өрті саладағы бірқатар түйіткілдің бар екенін көрсетті.
Орманның қауіпсіздігіне жауапты мамандардың қызметтік көлігін айтпағанда, қарапайым құрал-жабдығы мен арнайы формалары да жоқ. Оның үстіне орманшылардың жалақысы да төмен.
24.kz арнасы пікірін ұсынған сарапшы Жағпар Кәрімжамның айтуынша, сала серпілісіне елдегі орман шаруашылығына бөлінетін қаржының аздығы кедергі келтіріп отыр.
«Орман шаруашылығында жұмыс істейтін қарапайым қызметкерлердің жалақысы тым аз. Орташа есеппен алғанда шамамен 100 мың теңге. Бірақ олардың жұмыс жүктемесі жоғары. Кей инспектордың қызметтік көлігі жоқ, көбіне олар өз көлігін пайдаланады. Сол үшін қазір жастардың бұл мамандыққа қызығушылығы төмен. Салада проблема көп. Өйткені, орман шаруашылығындағы басшылық лауазымдарға тағайындалғандардың дені осы салаға қатысы жоқ», - дейді орманшы Жағпар Кәрімжан.