Биыл Ораза 19 ақпанда басталады. Ел арасында Қасиетті айға дейін 40 күн ішінде ішімдік ішкен адамның амал-ниеті қабыл болмайды" деген пікір жиі айтылады. Бұл туралы Қазақстан мұсылмандар діни басқармасы мен Нұрлан имам не дейді? Ішімдік ішкен адамның қаны қанша күнде тазарады? Толығырақ aqshamnews.kz материалында.
ҚМДБ ұстанымы қандай?
ҚМДБ-ның түсіндіруінше, арақ-шарап ішу - харам әрі үлкен күнә. Бұл жөнінде Құранда да, хадисте де қатаң ескерту бар.
Көп тараған хадистердің бірінде: "Кім арақ ішсе, оның қырық күндік намазы қабыл болмайды" деп келеді.
Алайда ҚМДБ келтірген Имам Науауидың түсіндірмесі маңызды: "қабыл болмайды" дегені - парыз мойнынан түседі, бірақ сауабы кемиді, жоғалады деген мағынада. Яғни:
- Намаз да, ораза да міндет ретінде сақталады (ұстай береді, оқи береді).
- Бірақ арақтан тыйылмай жүрсе, сауапқа зиян келеді.
- Ал шынайы тәубе етсе, күнәның салдары жеңілдеп, Алла тәубесін қабыл етеді.
ҚМДБ адам Рамазанға екі күн қалғанда арақ ішіп, кейін шын тәубе етсе, Алла тәубесін қабыл етеді, оразасы да дұрыс болады деген мысал келтірді.
Нұрлан имамның жауабы
Бұған дейін Нұрлан имам ел ішіндегі кең тараған қауесетке нақты тоқталған еді.
"Оразаға дейін 40 күн ішімдік ішпей тазалану керек", "Оразадан кейін 40 күннен соң қайта іше беруге болады"
деген сөздердің барлығы - қате.
Оның айтуынша, ішімдіктің оразаға қатысы "40 күн есептеу" арқылы емес, жалпы шариғи тыйым ретінде қаралады: яғни мұсылманға ішімдік әрдайым харам, тек Рамазанға байланып қалмайды. Ал "Ораза кезінде ішіп қойсаң, ораза ұстамайсың" деу де дұрыс емес: ораза ұстай береді, бірақ ішімдік ішсе - күнә арқалайды.
Ішімдік ішкен адамның қаны қанша күнде тазарады?
Ұлыбританиядағы клиникалық тәжірибеде қолданылатын деректерге (NHS материалдары және NHS ауруханаларының зертхана нұсқаулықтары) сүйенсек, "қаннан алкогольдің тазаруы" деген екі түрлі нәрсені білдіруі мүмкін:
- қандағы этанолдың (ішімдік) нөлге түсуі,
- ішімдік ішкенді "көрсететін" талдаулардың қалыпқа келуі.
Қандағы этанол қанша уақытта тарайды?
NHS түсіндіруінше, 1 алкоголь бірлігі (unit = 8 г таза спирт) - орташа ересек адамның ағзасы шамамен 1 сағатта тарата алатын мөлшер. Яғни көп жағдайда қандағы этанол бірнеше сағат ішінде тарайды.
"40 күн" деген қайдан шыққан?
"40 күн" дегені көбіне этанолдың қаннан тарауы емес, жиі ішімдік ішуді көрсететін қан талдауларының қалыпқа келуіне қатысты айтылады. Мысалы, NHS Gloucestershire Hospitals зертханалық мәліметінде CDT (carbohydrate-deficient transferrin) талдауының жартылай ыдырау уақыты ~2 апта деп беріледі. Сондықтан ішімдікті тоқтатқаннан кейін бұл көрсеткіштің "қалыпқа келуі" бірнеше аптаға созылуы мүмкін.