Биыл Алматыдағы Наурыз мерекесі ерекше сипат алды – ол дәстүрлі тойлау шеңберінен шығып, мыңдаған адамды жаңару, музыка және ұлттық дәстүрлердің ортақ ырғағында біріктірген ауқымды мәдени іс-шараға айналды, - деп хабарлайды aqshamnews.kz.
Оңтүстік астана бірнеше күн бойы тарих, өнер және Ұлы даланың рухы тоғысқан тірі кеңістікке айналды. Мереке қаланың барлық аумағын қамтыды, ал ерекше атмосфера Астана алаңындағы басты сахнада жалғасты. Мұнда таңертеңнен кешке дейін әуен толастамай, қалаға көктемнің серпіні мен бірлік рухын сыйлады.
Алматы қаласы Оқушылар сарайының музыкалық Наурыз керуені мерекенің ең жарқын әрі есте қаларлық сәттерінің біріне айналды. Балалар мен педагогтердің өнер көрсетуі ауқымды концерттік бағдарламаны ұсынды. Бұл бағдарлама ұрпақтар сабақтастығы мен жоғары көркемдік деңгейдің айқын көрінісі болды. Қаланың басты сахналарының бірінде өнер көрсету Оқушылар сарайы ұжымдарының шығармашылық әлеуетін айқындады.
Бағдарлама қазақ руханиятының шынайы антологиясы ретінде құрылды: терең мағыналы термелерден бастап заманауи эстрадалық туындыларға дейін қамтылды. Концерттің шымылдығын Сая Махамбет ашып, «Қазағымсың», «Өсиет» және серпінді «Желдірме» шығармаларын әсерлі орындау арқылы көрермендерді бірден мерекелік көңіл күйге бөледі.
Концерттің ерекше мәртебесін Қазақстан эстрадасының танымал өнерпаздары әрі Оқушылар сарайының талантты педагогтары Балауса Ерғалина мен Дидар Кәден жүргізуші ретінде айқындай түсті.
Кештің музыкалық палитрасы мазмұнға бай әрі алуан түрлі болды. Айдар Абдрахманов алматылықтарға «Әдемі-ау» және «Лучший город земли» әндерімен жүрекке жылы тиетін лирикалық сәттер сыйлады. Жас өнерпаздар Дастан Тұрдалы, Амина Әбділбекова, Майдан Аймауыт және Ханшайым Пшан ұлттық музыкалық мұраны терең түсініп, жоғары деңгейде орындай алатындарын көрсетті.
«Қазақ ұлы» және «J voice teen» ұжымдары алаңды қуатты энергиямен толтырып, Махамбет термелерін заманауи эстрадалық шығармалармен үйлестіре орындады. Жігер Сәтханов пен Жанат Рақыметованың дуэті «Алматым менің» және «Ханзада мен Ханшайым» әндері арқылы кешке ерекше көрік қосты.
Мерекенің шынайы рухын халық аспаптарының әуені айқындады. «Парасат» этно-ансамблі өзінің жоғары шеберлігімен көрермендерді тәнті етіп, қазақ халқының мәдени тамырларының тереңдігін тағы бір мәрте көрсетті. «Шах», «Хафиз», «Рух» және «Домбыра үні» шығармалары концерттің жарқын финалына айналды.
Оқушылар сарайының директоры Айгүл Байсымакова іс-шараның маңыздылығына тоқталып: «Музыкалық Наурыз керуені мерекелік бағдарламаның бір бөлігі ғана емес, ұрпақтар сабақтастығының, мәдени мұраны сақтаудың және оны заманауи форматта жаңғыртудың жарқын үлгісіне айналды. Бұл концерт дәстүрлердің тек сақталып қана қоймай, дамып, жас буын мен ересектердің жүрегінен орын алып жатқанын көрсетті», – деп атап өтті.
Биыл Алматыдағы Наурыз жаңа деңгейдегі мерекеге айналды – әрбір әуен, әрбір өнер көрсету және әрбір қуанышты сәт бірлік, жаңару және ұлттық құндылықтарға деген құрметтің маңызын тағы бір мәрте айқындады. Осындай игі бастамалар Наурыз рухының өміршеңдігін дәлелдеп, болашаққа сенім, үйлесім және ізгілік нұрын сыйлайды.