Отан қорғаушылар күніне орай «Заң мен Тәртіп» қағидатын іске асыру аясында Алматы қаласы Ішкі саясат басқармасының Қоғамдық даму орталығы «№175 Жаңа ғасыр» мектеп-гимназиясының «Жас Сақшы» патриоттық сыныбының оқушылары үшін Алматы қаласы Полиция департаментінің музейіне экскурсия ұйымдастырды, – деп хабарлайды aqshamnews.kz тілшісі.
Экскурсия барысында оқушылар музей тарихымен танысты. Музей меңгерушісі Барақат Бегалы Шотыбайұлы оқушыларға ішкі істер органдарының тарихы туралы айтып берді. Сондай-ақ 2011 жылдың 12 қарашасында Тараз қаласында лаңкестерді ұстау кезінде қызметтік борышын атқару үстінде қаза тапқан Ғазиз Байтасовтың ерлігін сипаттайтын естелік фотосы мен мемориалдық тақта көрсетілді. Оқушыларға оның батырлығы мен ержүректігі туралы айтылды.
Мұндай іс-шаралар «Заң мен Тәртіп» қағидатын жастар арасында насихаттауға және өскелең ұрпақтың бойында патриоттық сезім мен құқықтық мәдениетті қалыптастыруға бағытталған.