Алматы жолаушылар көлігі және технологиялар колледжінің «Жас сарбаз» әскери-патриоттық қозғалысы бөлімшесінде әскерге шақыруға дейінгі жастарға арналған жасөспірімдерге ұшқышсыз технологиялар мен робототехника әлемін игеруге мүмкіндік беретін бірегей оқу курсы ашылды.
Бағдарламаның негізгі мақсаты – оқушы жастарды дрондарды басқару өнерін зерттеуге және робототехника сабақтарына тарту. Оқу барысында оқушылар мен студенттер техникалық дағдыларды игеріп қана қоймай, сонымен қатар инженер-конструктор, инженер-технолог, жобалаушы, бағдарламашы және әскери саладағы ҰҰА операторы мамандықтары туралы түсінік алады, деп хабарлайды Almaty-akshamy.kz ҚР Қорғаныс министрлігіне сілтеме жасап.
Бүгінгі таңда бағдарлама аясында тоғыз FPV-дрон операторы дайындалды. Олар acro режимінде квадрокоптерді сенімді басқарып, нысандарға өз бетінше барлау жасай біледі. Сонымен бірге «сегіздік», «жылан», «бөшке» және басқа фигураларды орындай алады.
Оқушылар аэродинамика, ұшқышсыз ұшу аппараты теориясы және картографияны игерген. Сонымен қатар, олар спорттық зымыран корпустарын жасау бойынша оқудан өтті және зымырандық модельдік спорт жарыстарына қатысуға дайын.
«Қазіргі уақытта S4, S8 және S6 зымыран сыныптарында зымырандық модельдік спорт жарыстарына қатысу үшін үш адамнан тұратын екі команда дайындалды. Олардың барлығы қауіпсіздік техникасы бойынша кіріспе, теориялық және ұшу алдындағы нұсқаулықтан өтті. Осы жазда Өзбекстан мен Қырғызстанда өтетін жарыстарға қатысуды жоспарлап отырмыз», – деп атап өтті зымыран спорты мен дрондарды дамыту жобасының жетекшісі FPVschool.kz Владислав Барышев.
Бұл білім беру бағдарламасы оқушылардың білім көкжиегін кеңейтіп қана қоймай, оларды авиация, зымыран және робототехника саласында одан әрі оқыту мен кәсіби дамуға жетелері сөзсіз.