Алматы зоопаркі қоғамда алаңдаушылық тудырған мәселелерге қатысты әрдайым түсініктеме беруге дайын.
Бүгінде зообақта Диана есімді ерекше ягуар өмір сүруде. Оның тағдыры оңай болған жоқ. 2007 жылы әлі күшіктей кезінде ересек аталық — өз әкесінен қатты жарақат алып, бір аяғынан және құйрығынан айырылған.
Зоология мен ветеринария стандарттары бойынша мұндай ауыр жарақат алған жануарларға эвтаназия (ұйықтатып жіберу) ұсынылады. Алайда, Алматы зообағының ветеринарлық қызметі ерекше шешім қабылдап, оның өмірін сақтап қалуды жөн санады. 2007 жылы мамандар Диананы құтқарып, оны аялап аман алып қалды. Олар үшін әрбір тіршілік иесі, қандай да бір кемістігі болса да, қамқорлыққа және лайықты өмірге құқылы.
Көп жыл бойы Диана келушілерге көрінбейтін, жабық вольерде ұстаған. Алайда уақыт өте келе, оның денсаулығы тұрақтанып, жағдайы жақсарған соң, зообақ әкімшілігі мен мамандар оны ашық вольерге шығарып, келушілерге көрсету туралы шешім қабылдады. Бұл – ерекшелігі бар жануарларға деген мейірімді және ықтиятты қарым-қатынастың символы.
Қазір Диана – 18 жаста. Бұл ягуар үшін аса құрметті жас саналады. Ол үнемі ветеринарлық бақылауда, арнайы күтім мен бейімделген тамақтану алып тұрады. Оның жүрісіндегі ерекшелік – аурудың белгісі емес, өмір жолының бір бөлігі. Бұл – біз ашық айтып жүрген шынайы тарих.