Премьер-министр Олжас Бектенов Қазақстанда қосылған құн салығының (ҚҚС) мөлшерлемесін арттыру қажет екенін мәлімдеді. Бұл қадам салық жүйесін реформалау аясында талқыланатын негізгі шаралардың бірі болмақ.
Вице-премьер Серік Жұманғариннің айтуынша, ҚҚС бойынша тіркеу шегін төмендету де жоспарланып отыр. Қазіргі шек 78 млн теңге болса, оны 15 млн теңгеге дейін азайту ұсынылуда.
– «Қазіргі уақытта 2,3 миллион бизнес субъектісінің тек 6%-ы, яғни 137,7 мыңы ғана ҚҚС төлеуші болып табылады. Ал іс жүзінде ҚҚС төлеушілер саны небәрі 88 мың. Мұның бір себебі – ҚҚС бойынша тіркеу шегінің жоғары болуы», – деді Жұманғарин.
Салық жүйесін реформалау және ҚҚС мөлшерлемесін арттыру мәселесі алдағы уақытта Парламентте және сарапшылар арасында талқыланатын болады. Бұл өзгерістер шағын және орта бизнеске әсер етуі мүмкін, сондықтан үкімет барлық тараптардың пікірін ескеруді көздеп отыр.