Олжас Бектенов пен Нигерия Федеративті Республикасының Ифе Королі Оони Адейейе Энитан Огунвуси ынтымақтастық мәселелерін талқылады, деп хабарлайды aqshamnews.kz Үкіметтің телеграм каналына сілтеме жасап.
Қазақстан Республикасының Премьер-министрі Олжас Бектенов елімізге Астана халықаралық форумына қатысу үшін келген Нигерия Федеративті Республикасы Ифе Королі Оони Адейейе Энитан Огунвусимен кездесті.
Биылғы 14 қаңтарда «Абу-Дабидің орнықты даму апталығы» халықаралық саммиті аясында қол жеткізілген Қазақстан мен Нигерия президенттері арасындағы уағдаластықтарды жүзеге асыру мәселелері талқыланды. Сауда-экономикалық және инвестициялық ынтымақтастыққа, АӨК, көлік және логистика, энергетика, геологиялық барлау, цифрлық технологиялар және басқа да салалардағы өзара іс-қимылға назар аударылды.
Өткен жылы Қазақстан мен Африка елдері арасындағы жалпы тауар айналымы 15,4%-ға өсіп, $789,2 млн-ды құрады. Аграрлық сектолрда қазақстандық бидайды Нигерияға жеткізілу келешегі қарастырылды. Көлік және логистика саласында Орта дәліз Қазақстанға Солтүстік және Батыс Африка нарығына тауар экспорттау үшін мүмкіндіктер ашады.
Кездесу қорытындысы бойынша тараптар Қазақстан мен Нигерия арасындағы екіжақты өзара тиімді ынтымақтастықты кеңейтуге жәрдемдесуге ниетті екенін растады.