Олжас Бектенов Атырау облысындағы мұнай, газ химиясын және өнеркәсіпті дамыту жөніндегі тапсырмалардың орындалуын тексерді
Атырау облысына жұмыс сапары барысында Премьер-Министр Олжас Бектенов өңір өнеркәсібінің дамуымен танысып, индустриалды компаниялар мен мұнай-газ химиясы секторының кәсіпорындарына барды. Бұл сапар Президенттің терең өңдеуге көшу және өнімнің ішкі құнын арттыру арқылы экспорттың шикізаттық бағытынан бас тарту және экономиканы әртараптандыру жөніндегі тапсырмасының орындалуын тексеру мақсатында өтті.
Атырау облысы еліміздің мұнай-газ химиясы саласындағы жетекші өңірі болып табылады. Мұнда мұнай қорының 80%-на дейін шоғырланған, Теңіз бен Қашаған ірі кен орындары орналасқан. Қашағанда қазіргі уақытта жобалық қуаты жылына шамамен 1 млрд текше метр болатын «GPC INVESTMENT» ЖШС газ өңдеу зауытын салу бойынша ірі инвестициялық жоба іске асырылуда.
Премьер-Министрге шикі газды қайта өңдеудің ұлттық бағдарламасы аясында жұмыс жүргізіліп жатқаны баяндалды. Бүгінгі таңда құрылыс-монтаждау жұмыстары 11%-ға аяқталды, бұл ретте нысанның жалпы дайындығы 23%-ға жетеді. Олжас Бектенов QazaqGaz компаниясы қатарлық инвесторлармен бірлесіп жүзеге асырып жатқан жобаның маңызын атап өтті. Зауытты пайдалануға беру еліміздің өңірлеріне қосымша газ көлемін жіберуге мүмкіндік береді.
NCOC компаниясы Қашаған кен орнынан зауытқа шикізатты тасымалдауды қамтамасыз ететін құбыр салу жобасын іске асыру жөніндегі жоспары туралы мәлімет берілді. Бүгінгі таңда NCOC QazaqGaz-бен бірлесіп жылына 700 мың тоннаға дейін сұйытылған көмірсутекті газды нарыққа жеткізу бойынша жұмыс істеп жатыр. Сонымен бірге жылына 1 млрд текше метр газ тасымалдауды қамтамасыз ететін құбыр инфрақұрылымының құрылысын аяқтауда.
Олжас Бектенов «Kazakhstan Petrochemical Industries Inc.» ЖШС (KPI) полипропилен өндіру зауытында болды. Зауыт іске қосылған сәттен бастап 341,4 мың тонна түйіршікті полипропилен өндірілді. Қазақстанның полипропилен нарығының құрылымындағы KPI кәсіпорнының үлесі 2022 жылы 2%-ды құраса, 2023 жылдың екінші тоқсанына қарай 49%-ды құрады.
Премьер-Министр Атырау мұнай өңдеу зауытының қазіргі жағдайымен және дамыту жоспарымен танысты. Мұнай өнімдерінің 35-ке жуық түрін шығаратын зауытта биылғы 7 айда шикізатты қайта өңдеу көлемі 3,4 млн тоннаны құрады. Үкімет басшысы ауыл шаруашылығы тауарын өндірушілерге дизель отынын тұрақты өндіруді және тиеп-жөнелтуді толық көлемде қамтамасыз етуді тапсырды.
АМӨЗ-де экологиялық мәселелерге ерекше көңіл бөлінген. Мемлекет басшысының тапсырмасы бойынша әзірленген «Тазалық» жобасы шеңберінде механикалық тазарту құрылыстары мен нормативті түрде тазартылған ағынды суларға арналған арнаны реконструкциялау, сондай-ақ булану алаңдарын рекультивациялау көзделген.
Үкімет басшысы «Жігермұнайсервис» зауытында болып, өңірдегі машина жасау саласының даму қарқынымен танысты. Зауыт бұрғылау-жару жұмыстарына арналған бұрғылау құралдары өндірісін іске қосты. Олжас Бектенов нарықтың ішкі қажеттілігін өтеу үшін өндірісті кеңейтіп, қуатын арттыру керегін атап өтті.
Премьер-Министр Олжас Бектеновтің Атырау облысына сапары барысында өңірдің мұнай-газ химиясы және өнеркәсіп саласындағы дамуы, экологиялық мәселелер және инфрақұрылымдық жобалар талқыланды. Президенттің тапсырмаларының орындалуын қадағалау үшін нақты шаралар қабылданды.